يبقى انت اكيد فى مصر

بداية بقول لكل اخوانا اللى متابعين المدونة معذرة على التأخير فى الكتابة و متابعة مشاركتكم

بس غصب عنى كانت فى بعض الظروف الخارجة عن ارادتى خلتنى بعيد عن الكتابة و عن المدونات

بس الحمد لله الظروف اتحلت و الدنيا بقت احسن و ان شاء الله ما غبش عنكم تانى و عن الكتابة و عن كتابتكم

يبقى انت اكيد فى مصر

كلمة مش عارف بقيت اقولها كتير بس غصب عنى مش عارف كل حاجة بتحصل غلط فى حياتنا بقى الرد بتاعها الطبيعى يبقى انت اكيد فى مصر . مش بهزر كنت ماشى رايح مشوار انا و اختى و احنا ماشيين اختى استنكرت بعض المشاهد اللى بنشفها فى الشارع المصرى العظيم كل يوم يعنى على سبيل المثال بتقولى احنا بقالنا اكتر من نص ساععة مستنين الميكروباص . فكان ردى الطبيعى عليها ما تتعجبيش من اللى بيحصل لأن يبقى انتى اكيد فى مصر

موقف تانى . و احنا ماشيين فى الطريق حصلت خناقة بين سواقين الميكروباصات و شتموا بعض بشتايم جميلة اوى . فابصتلى مستنكرة من اللى بيحصل و قولتلها نفس الرد يبقى انتى اكيد فى مصر

وكتير يا جماعة من المواقف اللى انتوا عارفنها و بتحصلنا كل يوم من زحمة و صعوبة المواصلات و التحركات و الخدمات اللى مش متوفرة فى الشوارع و الطرق و الحوادث الكتيرة اوى اللى بنسمع عنها من حادثة على الطريق الفلانىو لا عربية وقعت من ع الكوبرى و غيره و غيره

و اللى اكتر من كده المظلومين . ايوا المظلومين اللى فى بلدنا كتير كتير بالهبل اللى مش لاقين حقوقهم و مسلوب منهم كل شئ

يوم الجمعة اللى فات سمعنا خبر اعتقال الدكتور عصام و الحاج سيد نزيلى و باقى اخوانا اللى معاهم . انا زعلت بس كان خبر عادى بالنسبة لى قصدى اتعودنا على الاخبار السيئة و الاخبار الظالمة و الفساد و كل البرامج اللى بتتكلم عن كده خلاص ما بقتش قادر افتح التليفزيون و اتفرج على منى الشاذلى بتاعت العاشرة مساءا و لا المحور بتاع تسعين دقيقة

الكلام ده كله كلنا عارفينه و انا مش اخنقوا و لا اضايقكم بس انا قلت دا كله عشان اسألكم سؤال مش عارف اجابته

هل الحكومة و النظام نجحوا فى ان احنا نشوف كل المشاهد و ما نقدرش نعمل حاجة غير نستنكر و نتضايق شويا و شكرا على كده ؟؟

ياريت اللى عنده اجابة يرد عليا و يوضحلى

و كفاية لحد كده

و يلا مش نهم

و متنسوش .. يبقى انت اكيد فى مصر

بنى ادم بيحب مصر و بيحب كل المصرين بس للاسف .... مش عارف يعمل ايه